३१ चैत्र २०७७
नेकपा एमालेले समर्थन फिर्ता लिएसँगै अल्पमतमा परेका कर्णाली प्रदेशका मुख्यमन्त्री महेन्द्रबहादुर शाहीले सरकार जोगाउने अन्तिम प्रयास गरिरहेका छन्। नेपाली कांग्रेस र राप्रपालाई जोड्दासमेत सरकार जोगिने अवस्था छैन्। मुख्यमन्त्री शाहीको अन्तिम कसरत एमालेका केही सांसदमा देखिन्छ। ‘गणीतीय हिसावले हेर्दा सरकार टिकाउन गाह्रो छ,’ माओवादी केन्द्रका सांसद ठम्मरबहादुर विष्टले भने, ‘एमालेका सांसदले फ्लोर क्रस गर्छन् र सरकार टिक्छ भन्नेमा अपेक्षा गरेका छौं।’
एमालेको माधव नेपाल समूहका सांसदमध्ये केहीले अझै पनि आफूलाई साथ दिने मुख्यमन्त्री शाहीको अपेक्षा देखिन्छ। त्यसो हुन नसके संसद बैठकमा सम्बोधन गरेर राजीनामा दिने मुख्यमन्त्रीको तयारी छ। प्रदेशसभाको सातौं (हिउँदे) अधिवेशन वैशाख ३ गते सुरु हुँदैछ। ‘एमाले बाहेकका दल मिल्दा पनि बहुमत पुग्ने अवस्था कर्णालीमा छैन्,’ माओवादी केन्द्रका एक सांसदले भने। ४० सांसद रहेको प्रदेशसभामा माओवादी केन्द्रका सांसद धर्मराज रेग्मी एमालेमा प्रवेश गरेपछि पदमुक्त भएका छन्।
अब यहाँ ३९ सांसद मात्रै रहेका छन्। माओवादी केन्द्रबाट सांसद बनेका रेग्मी पदमुक्त भएसँगै कर्णाली प्रदेशसभामा एमालेको एकल बहुमत छ। सत्ताको बागडोर सम्हालिरहेको माओवादी केन्द्रसँग १२ जना सांसद छन् भने प्रमुख प्रतिपक्षी नेपाली कांग्रेसका ६ जना र राप्रपाका एकजना सांसद छन्। माओवादी केन्द्रले आफू नेतृत्वको सरकार टिकाउनका लागि एमालेको माधव नेपाल समूह, नेपाली कांग्रेस र राप्रपासँग नियमित छलफलमा गरिरहेको छ।
