२२ माघ २०७७, बिहिवार

प्रचण्ड-नेपाल समूहको नेकपाले बिहिबार आव्हान गरेको नेपाल बन्दको विरुद्धमा विवेकशील साझा पार्टीले माइतीघर मण्डलामा प्रदर्शन गरेको छ।

https://amzn.to/4myfPN5

विगत १० वर्षदेखि कुनै पनि पार्टीले बन्दको आव्हान गर्दा बन्दको विरोध गर्दै आएको विवेकशील साझा पार्टीको सोही अभियानको निरन्तरतास्वरूप आजको प्रदर्शन गरेको हो।

विवेकशील साझाका अभियन्ताहरूले बन्दले देश बन्दैन, नेपाल खुल्ला छ, गरी खान देऊ जस्ता नारा लेखिएका पम्प्लेट बोकेका थिए।

प्रदर्शनको क्रममा बोल्दै पार्टी संयोजक मिलन पाण्डेले भने, ‘विवेकशील साझा पार्टी आफ्ना राजनीतिक उपादेयताका लागि यस्ता कुसंस्कारगत आपराधिक अभ्यासको सहारा कहिल्यै लिने छैन, नागरिकको मौलिक हक अधिकार सुरक्षण तथा सुसंस्कृत राजनीतिक अभ्यासका पक्षमा विवेकशील साझा आम नेपाली सँगै अग्रपङ्क्तिमा उभिनेछ।’

नागरिकको स्वतन्त्रता पूर्वक हिँडडुल गर्न पाउने अधिकार र आम जनजीवन प्रतिकुल हुने गरी आह्वान हुने बन्दहड्तालका अलोकतान्त्रिक अराजक कार्यक्रमहरूको विवेकशील साझाले प्रतिरोध गर्ने पार्टीका नेताहरूले बताए।

‘परम्परागत राजनीतिक दलहरूले यस्तो कुसंस्कारको जगेर्ना गर्न नछाड्ने नै हो भने आम सर्वसाधारण , पेसाकर्मी तथा व्यापार-ब्यवसायीले स्वतःस्फूर्त नागरिक अवज्ञा आन्दोलनमा उत्रने छन्,’  पार्टीको अभियान विभाग प्रमुख प्रमेश श्रेष्ठले भने ।

सरकारको असंवैधानिक कदमहरूको विपक्षमा विवेकशील साझा पहिलो दिनदेखि सडकमा आएको भद्दै पार्टीले  सबै शान्तिपूर्ण प्रदर्शनहरूमा आफ्नो ऐक्यवद्धता रहने स्पष्ट पारेको छ।