अर्जुनधारा नगरपालिका वडा नं. १ मा समुदायका ७१ जनामा गरिएको पि.सि.आर. टेष्ट नेगेटिभ देखिएकाे छ । स्थानीय एक युवामा कोरोना भाइरस संक्रमण पुष्टि भएपछि नगर स्वास्थ्य शाखाले समुदायमा कन्ट्याक ट्रेसिङ गरी स्वाब संकलन गरेको थियो ।
सोमबार १ नम्बर वडाका ७१ जनाको स्वाब संकलन गरी परीक्षणका लागि विराटनगर पठाइएको थियो ।
७१ जना सबैको आज बुधबार रिपोर्ट नेगेटिभ आएको स्वास्थ्य शाखा प्रमुख मुकुन्द बस्नेतले जानकारी दिए । उनका अनुसार संक्रमित पुष्टि भएका व्यक्तिको परिवारको रिपोर्ट पनि नेगेटिभ आएको छ ।
अन्य वडामा पनि कन्ट्याक ट्रेसिङ गर्ने कार्य गरिएको छ । बुधबार मात्र १२७ जनाको पीसीआर परीक्षणका लागि स्वाब संकलन गरिएको छ । जसमा २५ जना क्वारेन्टाइनमा रहेका व्यक्ति छन् ।
नगर स्वास्थ्य शाखाले अर्जुनधारा ४, ५, ७, ८, ९, १० र ११ नम्बर वडाका १०२ जनाको कन्ट्याक ट्रेसिङ गरिएपछि स्वाब संकलन गरिएको बस्नेतले जानकारी दिए ।
