काठमाडौं –नेकपा (माओवादी केन्द्र) का वरिष्ठ नेता नारायणकाजी श्रेष्ठले मुलुकलाई यथास्थितिमा राख्न नहुने भन्दै तत्काल सुधार आवश्यक रहेको बताएका छन्। उनले वर्तमान अवस्थामा परिवर्तन नआए राष्ट्रिय सार्वभौमिकता, स्वाधीनता, लोकतान्त्रिक उपलब्धि र राष्ट्रिय एकता नै खतरामा पर्न सक्ने चेतावनी दिएका छन्।

श्रेष्ठका अनुसार, यथास्थितिले मुलुकलाई असफल राष्ट्र बन्ने दिशामा धकेल्न सक्छ। उनले “प्रतिगमन मुर्दाबाद” मात्र भन्दैमा लोकतन्त्र जोगिँदैन भन्दै सुशासन, विकास र समृद्धि नै लोकतन्त्रको सशक्त रक्षा गर्ने उपाय रहेको स्पष्ट पारे।

“हामीले जनतालाई लोकतन्त्रले राजनीतिक अधिकार मात्र दिएको होइन, सामाजिक न्यायसहितको समृद्धिद्वारा जीवनका आधारभूत आवश्यकताहरू पूरा गरेर नयाँ जीवन दिएको अनुभूति गराउन सक्नुपर्छ,”उनले भने।

श्रेष्ठले सुधारका लागि सकारात्मक संविधान संशोधन, सुशासन र समृद्धिको मार्ग अपनाउनु पर्ने बताए। उनले राजनीतिक पार्टीहरू र नेताहरू बदलिनु अनिवार्य रहेको उल्लेख गर्दै, “राजनीतिको सफाई र शुद्धीकरण अपरिहार्य छ,”।

राष्ट्रिय एकता बलियो बनाउन सबै दलहरूबीच आवश्यक छलफल, सहकार्य, सहमति र सम्झौताका लागि आफूहरू तयार रहेको समेत उनले बताएका छन्। यथास्थिति तोडेर मात्र लोकतन्त्रको रक्षा गर्न सकिन्छ भन्नेमा श्रेष्ठ दृढ रहेका छन्।