काठमाडौं / एमाले नेतृत्वको नयाँ सत्ता समीकरणको संयुक्त बैठकमा सहभागी हुन प्रधानमन्त्री एवम् माओवादी केन्द्रका अध्यक्ष पुष्पकमल दाहाल ‘प्रचण्ड’नयाँ बानेश्वर पुगेका छन्। नयाँ बानेश्वरस्थित संसद भवनमा बैठक बोलाइएको बैठकमा नयाँ सत्ता समीकरण बैठक बस्न लागेको हो।
बालकोटमा एमालेको आन्तरिक बैठक जारी रहेकाले अध्यक्ष केपी शर्मा ओली केहि समयपछि संसद भवन नयाँ बानेश्वर आउने बताइएको छ। एमाले अध्यक्ष ओलीसहितको समर्थनमा प्रचण्ड तेस्रो पटकप्रधानमन्त्रीमा नियुक्त भएका छन्। बैठकमा प्रचण्ड नेतृत्वको सरकारमा सहभागी हुने मन्त्रीमण्डलबारे छलफल हुन लागेको हो।
आइतबारको बालकोट बैठकमा पहिलो चरणमा प्रचण्डलाई प्रधानमन्त्री र राष्ट्रपति र सभामुख एमालेले पाउने, साढे २ वर्षमा माओवादी-एमालेले प्रधानमन्त्री आलोपालोमा लिने सहमति बनेको छ। नयाँ गठबन्धनमा पावर शेयरिङको थप विषय टुंग्याउन बाँकी रहेको छ ।
प्रचण्डलाई आइतबार साँझ राष्ट्रपति विद्यादेवी भण्डारीले संविधानको धारा ७६ (२) बमोजिम प्रधानमन्त्रीमा नियुक्त गरेकी हुन्। प्रधानमन्त्री प्रचण्डले आज अपरान्ह ४ बजे शपथग्रहण गर्दैछन्। आज अपराह्न चार बजे केही मन्त्रीले पद तथा गोपनीयताको शपथ ग्रहण गर्दैछन् । माओवादी केन्द्रले नारायणकाजी श्रेष्ठलाई उपप्रधानमन्त्री बनाउँदैछ। उनको मन्त्रालय भने छलफलपछि टुंगो लाग्नेछ।
प्रचण्डको शपथ ग्रहणसँग सानो आकारको मन्त्रीमण्डल गठनका लागि बैठकले मन्त्रालय र मन्त्री हुनेको नाम टुङ्गो लगाउने बताइएको छ। २ सय ७५ रहेको प्रतिनिधिसभामा बहुमतका लागि १ सय ३८ चाहिन्छ।
प्रधानमन्त्री पाएको माओवादी केन्द्रको ३२ सिट छ। प्रधानमन्त्री बनेका प्रचण्डलाई एमालेको ७८, राष्ट्रिय स्वतन्त्र पार्टीको २०, राष्ट्रिय प्रजातन्त्र पार्टीको १४, जनता समाजवादी पार्टीको १२, जनमत पार्टीको ६, नागरिक उन्मुक्ति पार्टीको ४ र तीन जना स्वतन्त्र सांसदको समर्थन छ।
