कलाकार भएपछि फिल्मको पात्रलाई जीवन्त रुपमा निर्वाह गर्न सक्ने खुबी हुनुपर्छ र फरक चरित्रमा आफूलाई ‘एक्सपेरिमेन्ट’ गर्ने हिम्मत पनि गर्नुपर्छ । नयाँ छिमलका कलाकारहरु यसप्रति खासै गम्भीर देखिँदैनन् । एउटा चरित्रमा दर्शकले रुचाएपछि उनीहरु त्यसबाट मुक्त हुनै चाहँदैनन् । त्यसैले हरेक फिल्ममा उनीहरुको एकैखाले चरित्र र उस्तै अभिनय हुन्छ । फरकपन नै भेटिँदैन ।

तर, अभिनेत्री मलिका महतलाई प्रदर्शनरत फिल्म ‘पानीफोटो’मा हेरेपछि नयाँ पुस्ताका कलाकारहरु पात्रको मनोविज्ञान र नाडी समातेर पनि अभिनय गर्न सक्छन् भन्ने महशुस हुन्छ । डेब्यू फिल्म ‘यात्रा’मा दृष्टिविहीन गायिकाको भूमिकामा प्रशंसायोग्य अभिनय गरेकी उनले ‘पानीफोटो’मा धेरै माथि उठेर अभिनय गरेकी छन् । राधा पात्रमा उनले गरेको अभिनय स्वभाविक लाग्छ, मन छुन्छ ।