२० भाद्र २०७८, आइतवार
दाङ, घोराही उपमहानगरपालिका-१३ वडरा बस्ने २५ वर्षीय ईन्द्र कमल वुढामगरलाई म्याग्जिन लोड भएको अटोमेटिक पेस्तोल १ थान र १ राउण्ड गोली सहित शुक्रबार राति प्रहरीले पक्राउ गरेको छ ।
उनको घरमा अवैध हातहतियार पेस्तोल लुकाई राखेको भन्ने सूचनाको आधारमा जिल्ला प्रहरी कार्यालय दाङबाट खटिएको प्रहरीले खोजी गर्ने क्रममा उनको घरमा पार्किङ गरी राखेको रा.५ प ८७६२ नम्बरको स्कुटर मुनि प्लाष्टिकमा लुकाई राखेको उक्त हतियार फेला पारी उनलाई पक्राउ गरेको हो । साथै दाङ, तुलसीपुर उपमहानगरपालिका-४ खाद्रेस्थित न्याउली सामुदायिक वनमा स्याउलाभित्र अपरिचित व्यक्तिले लुकाई राखेको १ थान भरुवा बन्दुक प्रहरी चौकी खाद्रेबाट खटिएको प्रहरीले शनिबार दिउँसो फेला पारी बरामद गरेको छ ।
यस्तै खोटाङ, हलेसी तुवाचुङ नगरपालिका-१० बस्ने दिलसेर राई र ५५ वर्षीय खड्ग सिंह राईलाई २ थान भरुवा बन्दुक सहित शनिबार दिउँसो प्रहरीले पक्राउ गरेको छ । उनीहरुको घरमा अवैध रुपमा भरुवा बन्दुक लुकाई राखेको सूचनाको आधारमा जिल्ला प्रहरी कार्यालय खोटाङबाट खटिएको प्रहरीले उनीहरुको घरबाट १/१ थान उक्त बन्दुक फेला पारी दुवै जनालाई पक्राउ गरेको हो ।
यसैगरीकञ्चनपुर, कृष्णपुर नगरपालिका-४ किचाई ग्वासी समैजी सामुदायिक बनमा बेवारिसे अवस्थामा रहेको १ थान एकनाले भरुवा बन्दुक शनिबार साँझ प्रहरीले बरामद गरेको छ । ईलाका प्रहरी कार्यालय गुलरीयाबाट खटिएको प्रहरीले उक्त बन्दुक फेला पारी बरामद गरेको हो ।
यस सम्बन्धमा प्रहरीले थप अनुसन्धान गरिरहेको छ ।
