टोकियो, जापान – नेपाली जनप्रगतिशील मञ्च, जापानले नेपाल विद्युत् प्राधिकरणका कार्यकारी निर्देशक कुलमान घिसिङको अपमानजनक बर्खास्तीप्रति घोर आपत्ति जनाउँदै सरकारको निर्णयको कडा भर्त्सना गरेको छ।

नेपाली कांग्रेस र नेकपा (एमाले) गठबन्धन सरकारले भ्रष्टाचार विरोधी अभियान सञ्चालन गरिरहेको माओवादी नेतृत्वको सरकार ढाल्न असंवैधानिक गठजोड गरेको आरोप लगाउँदै मञ्चले सरकार गठनको प्रक्रिया नै गलत भएको जनाएको छ।

नेपाललाई १८–२० घण्टासम्मको लोडसेडिङको कहरबाट मुक्त गराई ‘उज्यालो युग’ को सुरुवात गर्ने नायक कुलमान घिसिङलाई बर्खास्त गर्नु जनविरोधी कदम भएको मञ्चको धारणा छ। कुलमानले प्राधिकरणलाई घाटाबाट १२ अर्ब नाफामा पुर्याउने, बक्यौता असुली गर्ने, स्वच्छ ऊर्जा व्यवस्थापनमा क्रान्तिकारी सुधार गर्ने योगदानलाई सरकारले बेवास्ता गरेको मञ्चको आरोप छ।

“यो निर्णयले सरकार जनताको नभई दलाल र बिचौलियाहरूको पक्षमा काम गरिरहेको प्रमाणित भएको छ,” मञ्चद्वारा जारी विज्ञप्तिमा उल्लेख छ।

मञ्चले प्रधानमन्त्री केपी शर्मा ओली नेतृत्वको सरकारलाई यो निर्णय तत्काल फिर्ता लिन आग्रह गर्दै अन्यथा गम्भीर मूल्य चुकाउनुपर्ने चेतावनी दिएको छ। साथै, देश-विदेशका सम्पूर्ण न्यायप्रेमी नेपालीलाई सरकारको यो बदनियतपूर्ण कदमको भण्डाफोर गर्दै सशक्त प्रतिरोध गर्न आह्वान गरेको छ।