काठमाडौं, १२ चैत्र – सरकारले नेपाल विद्युत् प्राधिकरणका कार्यकारी निर्देशक कुलमान घिसिङलाई बर्खास्त गरेको खबर सार्वजनिक भएसँगै देशभर आलोचना सुरु भएको छ। जनताले चरम लोडसेडिङको सामना गरिरहेका बेला सरकारको यो निर्णय आपत्तिजनक भएको भन्दै विभिन्न दलका नेताहरूले कडा प्रतिक्रिया दिएका छन्।

नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले सरकारको निर्णयप्रति गम्भीर असन्तुष्टि जनाउँदै भने, “हाम्रो नेतृत्वको सरकारले कुलमान घिसिङलाई नियुक्त गरेको थियो। उहाँको विज्ञता र हाम्रो सरकारको योजना मिलेर उज्यालो नेपाल निर्माण गर्न सफलता मिल्यो, जुन जन–जनलाई थाहा छ।”

प्रचण्डले थपे, “प्राधिकरणको बक्यौता उठाउनु जनताको हितमा छ भन्ने उहाँको धारणा सरकारले पटक–पटक अन्यायपूर्वक प्रश्न उठाएर कमजोर बनाउन खोजेको थियो। अहिले आएर मन्त्रीपरिषद् बैठकबाट बर्खास्त नै गरिएको खबर आएको छ। आशा गरौँ, यो खबर असत्य होस्। यदि सत्य रहेछ भने सरकारको यो कदम पूर्ण रूपमा गलत छ। यो निर्णयको म घोर निन्दा गर्छु र यसको प्रतिरोध गर्न सबैमा आग्रह गर्छु।”

कुलमान घिसिङलाई हटाउने सरकारको निर्णयले सामाजिक सञ्जालदेखि राजनीतिक वृत्तसम्म व्यापक आलोचना भइरहेको छ। ऊर्जाका जानकारहरू र आम जनताले समेत सरकारको यो कदमलाई स्वेच्छाचारी निर्णय भन्दै प्रश्न उठाएका छन्। सरकारले यसबारे अझै आधिकारिक धारणा सार्वजनिक गरेको छैन।

के सरकारले आफ्नो निर्णय फिर्ता लिनेछ? कि राजनीतिक खिचातानीकै कारण ऊर्जा क्षेत्रमा फेरि अन्धकार युग फर्किनेछ?

यस घटनाक्रमबारे थप जानकारी आउन बाँकी छ।