७ माघ २०७७, बुधवार
प्रदेश १ को सातौं संसद अधिवेशन बुधबार (आज) देखि सुरु हुँदै छ । सत्तारुढ नेकपा विभाजनपछि बैठक हुन लागेको हो । प्रदेशसभा बैठक दिउँसो २ बजे बोलाइएको छ ।
सरकारको नेतृत्व गरिरहेको नेकपा दुई समूहमा विभाजित भएपछि सुुरु हुन लागेको संसद बैठक मुठभेड तर्फ अग्रसर भएको देखिएको छ ।
नेकपा दाहाल–नेपाल समूहले मुख्यमन्त्री शेरधन राईविरुद्ध अविश्वास प्रस्ताव पेश गरेको अवस्थामा सुरु हुन लागेको अधिवेशनले अविश्वास प्रस्तावलाई प्रक्रियामा लैजानुपर्ने कानुनी बाध्यताको सामना गर्दै छ ।
प्रमुख प्रतिपक्षी कांग्रेसलाई साथमा लिएर सरकार ढाल्न दाहाल–नेपाल समूहलाई चुनौती छ । आफ्नो सरकारलाई निरन्तरता दिनका लागि कांग्रेसको चित्त बुझाउन मुख्यमन्त्री राईलाई पनि चुनौती छ ।
हाल प्रदेश सभामा ९३ जना प्रदेशसभा सदस्य मध्ये नेकपाका ६७ जना रहेका छन् । जसमा ३२ जना प्रचण्ड र नेपाल पक्षमा रहेका छन् । उनीहरुले मंगलबार विराटनगरको होटल एशियाटिकमा संसदीय दलको बैठकको आयोजना गरेका थिए । यसअघि, मुख्यमन्त्री राईविरुद्ध गत पुष १२ गते अविश्वासको प्रस्ताव दर्ता गराउँदा ३७ जनाको हस्ताक्षर रहेकोमा हाल पाँच जना प्रदेश सभासदस्यले आफ्नो अविश्वासको प्रस्ताव फिर्ता लिएको घोषणा गरिसकेका छन् ।
प्रमुख प्रतिपक्षी दल नेपाली काँग्रेसले सरकारमा सहभागि हुने÷नहुने विषयमा निर्णय गर्न सकेको छैन ।
सरकारमा सहभागिताबारे औपचारिक निर्णय नभएको प्रमुख सचेतक केदार कार्कीले बताए । मंगलबार विज्ञप्ति जारी गर्दै भनेका छन्,‘ अन्य राजनीतिक सहमति नहुँदा सम्म काँग्रेस तटस्थ नबस्ने, बस्नु हुँदैन ।’
