प्रधानमन्त्री तथा नेकपा एमालेका अध्यक्ष केपी शर्मा ओलीले आफ्नो उमेर र स्वास्थ्यबारे उठिरहेका टिप्पणीहरूलाई खण्डन गर्दै अबका दुई दशकभन्दा बढी समयसम्म सक्रिय राजनीतिमा रहने दृढता व्यक्त गरेका छन्।

एक सार्वजनिक कार्यक्रममा बोल्दै ओलीले भने, “कतिपयलाई मेरो उमेर र मेरो स्वास्थ्यको चिन्ता छ। अहिले म बिरामी छैन। अबको २०-२५ वर्षपछि बुढो हुन्छु, त्यसैले अहिले मेरो उमेर र स्वास्थ्यका कुरा गर्नुको औचित्य छैन।”

ओलीले पार्टी नेतृत्वबारे पनि कडा टिप्पणी गर्दै थपे, “केपी ओली बिनाको एमाले कसैले कल्पना गरेको छ भने त्यो कल्पना कहिल्यै पूरा हुँदैन।”

उनको यो अभिव्यक्तिले हालै राजनीतिक वृत्तमा भइरहेको नेतृत्व र उत्तराधिकारसम्बन्धी बहसको प्रत्यक्ष प्रतिक्रिया रहेको देखिन्छ। ओलीको भनाइले एमालेभित्रको आन्तरिक शक्ति सन्तुलनमा पनि नयाँ तरंग ल्याउने विश्वास गरिएको छ।