पत्रपत्रिका
कारोवार दैनिकवाट

३१ श्रावन २०७८, आइतवार

कतारस्थित नेपाली दूतावासले ट्रकोइज कन्स्ट्रकसन कम्पनीबाट जारी भएको प्रक्रियागत मागपत्र रद्द गरी अर्को म्यानपावरलाई दिएपछि कतार जान तयार रहेका ३४ नेपाली अलपत्र परेका छन् ।
दूतावासले २५ मार्च २०२१ मा नेपालस्थित विनामाई इन्टरनेशनल प्रालिलाई ३४ श्रमिकको मागपत्र प्रमाणिकरण गरेको भएपनि पुन सोही मागपत्र अर्को म्यानपावरलाई दिएपछि छनोट भएर रोजगारीका लागि कतार जान तयार रहेका नेपाली अलपत्र परेका हुन् ।
दूतावासले प्रमाणिकरण गरिदिएपछि विनामाई म्यानपावरलाई नेपाली श्रमिक पठाउने प्रक्रिया सुरु गरी छनोट भएका श्रमिकको सूची समेत रोजगारदातालाई पठाएको थियो । दूतावासले प्रमाणिकरण गरेको मागपत्रका आधारमा विनामाई म्यानपावरले २६ मार्च २०२१ का वैदेशिक रोजगार विभागबाट श्रम स्वीकृति लिएको देखिन्छ ।
प्रक्रिया अनुसार दक्ष जनशक्ति छनोट गरी ३४ जना नेपाली युवाको सूची रोजगारदाता ट्रकोइज कम्पनीलाई सूची पठाएपनि पछि एकाएक पहिलो म्यानपावरको मागपत्र रद्द गर्ने रोजगारदातालाई हालसम्म कारवाही गरिएको छैन ।

केहि दिनपछि विनामाई म्यानपावरले रोजगारदाता कम्पनीसँग श्रमिक पठाउने अनुमति माग्दा माग्दै सो मागपत्र अर्को म्यानपावरलाई दिएको देखिएको छ । रोजगारदाता कम्पनीले दूतावासमार्फत प्रमाणिकरण गरेर सोही डिमान्ड स्यारोन मेनपवारलाई पुनः ३४ श्रमिक पठाउन मागपत्र प्रमाणिकरण गरेको छ ।
स्यारोन कम्पनी र रोजगारदाता कम्पनीले पहिला नै प्रमाणिकरण भएको मागपत्र जाँचबुझ नै नगरी अर्को म्यानपावरलाई दिर्दा कतार जान तयार रहेका ३३ श्रमिक अलपत्र परेका छन् ।
विनामाई म्यानपावर कम्पनीका प्रबन्ध निर्देशक तिर्थबहादुर गुरुङले छनोट भएर विदेश जान तयार रहेका  श्रमिक अलपत्र बनाउने रोजगारदातालाई कालो सूचिमा राख्न वैदेशिक रोजगार विभागमा निवेदन दिएका छन् ।
नेपाली दूतावासले एकै प्रकृतिका मागपत्रलाई २ पटक प्रमाणिकरण गरेर श्रमिकलाई अलपत्र बनाएको गुरुङको भनाइ छ । एउटा कम्पनीलाई कामदार पठाउने पत्रमा प्रमाणिकरण गरिसकेपछि अर्को कम्पनीलाई पुनः उहि मागपत्रका आधारमा प्रमाणिकरण गर्नुले आर्थिक चलखेल भएको हुन सक्ने गुरुङले आशंका जनाए ।

तर कतारस्थित नेपाली दूतावासले पहिलो मागपत्र रद्द गर्नुपर्ने कारण देखाउँदै पठाएको पत्रमा रोजगारदाता कम्पनीले नै प्रक्रियागत रुपमा पहिलो म्यानपावरको माग रद्द गरिदिएको जनाएको छ ।
रोजगारदाता कम्पनीले पहिलो माग पठाएको विनामाई म्यानपावरलाइ पठाएको एकपत्रमा छाप र हस्ताक्षर आफ्नो नभएको दावी गरेको छ भने अर्को पत्रमा विनामाई म्यानपावरको लापरवाही र कमजोर सेवामाथि भएका कारण माग रद्द रहेको उल्लेख छ ।

यस सम्बन्धमा वैदेशिक रोजगार विभागले जानकारी माग गर्न कतारस्थित नेपाली दूतावासलाई पत्र पठाए पनि दूताबासले जानकारी नपठाएपछि विभागले पुनः ताकेतापत्र पठाएको कारोबारलाई प्राप्त पत्रमा उल्लेख छ । दूतावासले विभागलाई पठाएको जानकारीपत्रमा पहिलो म्यानपावरको मागपत्र रद्द गरी दोस्रो म्यानपावरलाई दिएको जनाएको छ ।