गृह मन्त्रालयका सहसचिव तीर्थराज भट्टराई भिजिट भिसाको नाममा मानव तस्करीको संगठित गिरोह सञ्चालन गरेको आरोपमा अख्तियार दुरुपयोग अनुसन्धान आयोगको छानबिनमा परेका छन्। अख्तियारले भट्टराईका तीनवटा मोबाइल फोन र एउटा ल्यापटप जफत गरी डिजिटल फरेन्सिक परीक्षणका लागि पठाएको छ। तीनमध्ये एक मोबाइल उनले विशेष रूपमा ट्राभल एजेन्सी, मेनपावर कम्पनी र कोर टिमका सदस्यहरूसँग सम्पर्क गर्न प्रयोग गर्दै आएको अनुसन्धानमा खुलेको छ।
भट्टराई त्रिभुवन अन्तर्राष्ट्रिय विमानस्थलस्थित अध्यागमन कार्यालयका प्रमुख थिए। उनलाई गत असोजमा गृहमन्त्री रमेश लेखकले नियुक्त गरेका थिए। अख्तियारले अन्डरकभर अपरेसनमार्फत प्रमाण संकलन गरेपछि उनलाई नियन्त्रणमा लिएको हो। उनको सचिवालयले छानीछानी अध्यागमनमा कर्मचारी पठाएर भिजिट भिसाको सेटिङमा संलग्न रहेको आरोप छ।
अख्तियारले भट्टराईसँगै ट्राभल एजेन्सी सञ्चालक बालकृष्ण ढकाल, खगेन्द्र सुवेदी र कविता पौडेललाई पनि नियन्त्रणमा लिई सोधपुछ गरेको छ। उनीहरूको खातामा महिनामै करोडौँ रुपैयाँको लेनदेन हुने गरेको पाइएको छ। उनीहरूले सो रकम भट्टराईलाई घरमै लगेर बुझाउने गरेको स्रोत बताउँछ।
यस प्रकरणमा गृह मन्त्रालयको नेतृत्व नै अनुसन्धानको दायरामा आएको छ। अध्यागमनमा कुनै पनि कर्मचारी मन्त्रीको सचिवालयबाट स्वीकृत नभई सरुवा नहुने प्रणाली बनाइएको मन्त्रालय स्रोत बताउँछ। विगतमा भिजिट भिसाको सेटिङ धन्दामा संलग्न देखिएपछि प्रहरीले मुद्दा दायर गरेका अधिकृत विमल पौडेललाई नै मन्त्री लेखकले आफ्नो सचिवालयमा राखेका थिए। विगतमा कारबाही गरेर हटाइएका अधिकृतलाई समेत चलखेलका आधारमा फेरि अध्यागमनमा पठाइएको थियो।
अख्तियारले पहिलो चरणमा अध्यागमन प्रमुख रहेका भट्टराईमाथि र दोस्रो चरणमा अन्य संलग्नहरूमाथि छानबिन गर्ने तयारी गरेको छ। तीन मोबाइल र ल्यापटपको प्रतिवेदन आएपछि यसमा संलग्नमाथि विस्तृत अनुसन्धान गर्ने अख्तियारको तयारी छ।
यस घटनाले भिजिट भिसाको नाममा भइरहेको मानव तस्करीको संगठित गिरोहको पर्दाफास गरेको छ। सरकारले यसमा संलग्न सबैलाई कारबाही गरी भिजिट भिसाको दुरुपयोग रोक्न कडा कदम चाल्न आवश्यक छ।
प्रतिक्रिया
सम्बन्धित खवर
