काठमाडौँ, १६ मंसिर । सत्तारुढ नेकपाभित्रकाे विवाद उत्कर्षमा पुगेकाे वेला सचिवालय बैठक आज बस्दै छ । पार्टीकाे मुख्य कार्यालय धुम्बाराहीमा दिउँसो बस्न लागेको बैठकमा नेकपा अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले एक-अर्काविरूद्ध अघि सारेका प्रस्तावमाथि छलफल गर्ने कार्यतालिका रहेकाे छ ।
अध्यक्ष एवं प्रधानमन्त्री ओली पक्षले अर्का अध्यक्ष प्रचण्डले ‘माफी माग्नुपर्ने’ बताइरहँदा प्रचण्ड पक्ष भने प्रधानमन्त्री ओली ‘सच्चिनुपर्ने’ अडान लिइरहेकाे छ । सचिवालय बैठकमा छलफल हुनुअघि नै दुवै पक्ष रणनीति बनाउन व्यस्त छन् ।
नेकपाका ‘कार्यकारी’ भनिएका अध्यक्ष प्रचण्ड र उनकाे साथमा रहेका वरिष्ठ नेता माधवकुमार नेपाल पक्षले ओलीलाइ एक्ल्याएरै लैजाने र बहुमतकाे निर्णय मान्न बाध्य पारिने रणनीति अँगालेकाे बुझिन्छ । साथै सचिवालय बैठकमा पेस भएका सबै पत्र र प्रस्ताव स्थायी कमिटीमा समेत लैजाने र छलफलबाटै निधाे गर्ने याे पक्षकाे प्रयास रहेकाे स्राेतकाे भनाइ छ ।
