राजधानी दैनिक
पत्रपत्रिकावाट
२६ असोज २०७७, सोमवार
काठमाडौं । गत वर्षको फागुनबाट नेपालमा कोरोना संक्रमण सुरु भयो । हाल नेपालमा कोरोना संक्रमितको संख्या १ लाख नाघिसकेको छ । संक्रमण बढ्दै जाँदा सरकारले कुनै पनि क्षेत्रमा काम गर्दा कसरी व्यवहार गर्ने भन्ने सन्दर्भमा प्रोटोकल तय गरेको छ ।
तर, सरकारका प्रधानमन्त्री, विभिन्न पार्टीका नेतादेखि मन्त्री र सरकारी उच्च ओहोदामा रहेका भीआईपीहरू नै सरकारी प्रोटोकल मान्दैनन् अर्थात् हेलचेक्रयाइँ गर्छन् । उनीहरू मास्क नलगाई सार्वजनिक कार्यक्रममा सहभागी हुँदै आइरहेका छन् ।
प्रधानमन्त्री केपी शर्मा ओलीले केही समयअघि पत्रकार ऋषि धमलासँगको टेलिभिजन अन्तर्वार्ताका क्रममा मास्क नै लगाएका थिएनन् । यस्तै, उनले २६ भदौमा सम्पन्न नेकपाको स्थायी समितिको बैठकमा समेत मास्क लगाएका छैनन् । प्रायः प्रधानमन्त्रीका भेटघाटका तस्बिरहरू बिनामास्कका देखिन्छन् । सत्तारूढ दलका अर्का अध्यक्ष पुष्पकमल दाहाल भने प्रायः मास्कमै पार्टीका कार्यक्रम तथा भेटघाटमा देखिन्छन् । उनले पार्टीका बैठक र भेटघाटका कार्यक्रममा मास्क लगाएको पाइन्छ ।
यसैगरी, कांग्रेस सभापति शेरबहादुर देउवासमेत विरलै मास्क प्रयोग गर्छन् । उनले बाहिर हिँड्दा मास्क प्रयोग गर्ने गरेको देखिए पनि कार्यक्रममा सहभागी हुँदा र नेताहरूसँगको भेटघाटमा मास्क प्रयोगमा बेवास्ता गरेको देखिन्छ । देउवाले राप्रपा परित्याग गरी कांग्रेस भित्रिएका सुनिल थापासँगको सामूहिक तस्बिर खिचाउँदा मास्क प्रयोगमा बेवास्ता गरिएको तस्बिर उनकै फेसबुक पेजमा छ ।
यस्तै, इनअफ इज इनअफका अनशनकारीलाई भेट्दा समेत देउवाले मास्क लगाएका थिएनन् । कांग्रेस वरिष्ठ नेता रामचन्द्र पौडेल पनि मास्क लगाउने तर हेलचेक््रयाइँ गर्नेमा पर्छन् । उनले १५ साउनमा पार्टी केन्द्रीय कार्यालयमा भएको पत्रकार सम्मेलनमा मास्क खोलेर टेबलमा राखेको तस्बिर उनकै फेसबुक पेजमा छ ।
यसैगरी, सरकारका उपप्रधानमन्त्री एवं कोरोना रोकथाम तथा नियन्त्रणका लागि सरकारबाटै बनाइएको उच्चस्तरीय समिति सीसीएमसीका संयोजक ईश्वर पोखरेल समेत मास्क प्रयोगमा हेलचेक्रयाइँ गर्नेमा पर्छन् । उनले समेत भूषण दाहालसँगको एक टेलिभिजन कार्यक्रममा मास्क नलगाईकन १० भदौमा अन्तर्वार्ता दिएको भिडियो पोखरेलको फेसबुक पेजमा छ । उनी बाहिरी कार्यक्रममा भने मास्कमा नै देखिन्छन् ।
यस्तै, सबैभन्दा सावधानी अपनाउनेमा गृहमन्त्री रामबहादुर थापा देखिन्छन् । उनी हरेकजसो भेटघाट र भ्रमणमा मास्कमा नै देखिने गरेका छन् । यस्तै, पराष्ट्रमन्त्री प्रदीप ज्ञवाली र पूर्वअर्थमन्त्री युवराज खतिवडासमेत मास्कको सावधानीपूर्वक प्रयोग गर्ने मन्त्रीमा पर्छन् ।
सरकारका पर्यटनमन्त्री योगेश भट्टराई भने मास्कको प्रयोगमा सबैभन्दा बढी हेलचेक््रयाइँ गर्नेमा पर्छन् । उनी गत साता बिनामास्क सुर्खेतदेखि आफ्नै गृह जिल्ला ताप्लेजुङ र राजधानी काठमाडौंमा भएका उच्चस्तरका भेटघाटमा सहभागी भए । हाल भने उनी कोरोना संक्रमण पुष्टि भएर आइसोलेसनमा बसेका छन् ।
पर्यटनमन्त्री भट्टराईसँगै गत २१ असोजमा ताप्लेजुङको ओलाङचुङगोलामा सशस्त्र प्रहरीको बोर्डर आउटपोस्ट उद्घाटनका लागि पुगेका गृह सचिव महेश्वर न्यौपाने, नेपाल प्रहरीका महानिरीक्षक शैलेश थापा क्षेत्री, सशस्त्र प्रहरीका महानिरीक्षक शैलेन्द्र खनाल र राष्ट्रिय अनुसन्धान विभागका प्रमुख गणेश अधिकरीले समेत मास्क नलगाएको तस्बिर सामाजिक सञ्जालमा भाइरल छन् ।
सर्वसाधारणलाई कारबाही
नेपाल प्रहरीले गत २२ असारदेखि हालसम्म मास्क प्रयोग नगरी सडकमा निस्किएका ५ लाख ५५ हजार ९ सय ९४ जनालाई कारबाही गरिएको बताएको छ ।
प्रहरीले बिनामास्क सडकमा हिँड्ने तथा मास्क पकेटमा राखेर हिँड्ने तथा लगाउँदा हेलचेक््रयाइँ गर्नेसम्मका गरी २२ असारयता हालसम्म ५ लाख ५५ हजार ९ सय ९४ जनालाई कारबाही गरिएको बताएको हो ।
नेपाल प्रहरीका प्रवक्ता कुवेर कडायतले सडकमा सरकारी प्रोटोकल नमानी मास्क प्रयोग नगरी हिँडेका, मास्क पकेटमा राखेर हिँडेका तथा लगाउँदा हेलचेक््रयाइँ गर्ने गरेका सर्वसाधारणलाई कारबाही स्वरूप सचेत गराउने गरेको र केहीलाई संक्रामक रोग ऐनअनुसार १ सय रुपैयाँका दरले जरिमानासमेत गरिएको जानकारी दिए ।
‘मास्क नलगाई हिँड्नेलाई किनेर लाउन लाएर पठाएका छौं, पकेटमा राखेर हिँड्ने, नलगाई सडकमा निस्कनेहरूलाई होल्ड गर्ने तथा एक सय रुपैयाँसम्म जरिमाना गरेर छाडेका छौं,’ प्रहरी प्रवक्ता कडायतले राजधानीसँग भने ।
कोरोना संक्रमण रोकथामका लागि गृह मन्त्रालयले जारी गरेको सुरक्षा मापदण्डअनुसार हिँडडुल गर्दादेखि सेवाप्रवाह गर्दासम्म अनिवार्य मास्क लगाउनुपर्छ ।
संक्रामक रोग नियन्त्रण ऐनअनुसार आवश्यकताअनुसार केन्द्र र प्रदेश सरकारले आवश्यक आदेश जारी गर्न सक्नेछन् । यसरी दिएको आदेश उल्लंघन गर्नेलाई १ सय रुपैयाँ जरिमानादेखि १ महिना कैद वा दुवै सजायको व्यवस्था छ । साथै, नियम पालना गराउनेलाई बाधा पु-याउनेलाई ६ सय रुपैयाँ जरिमाना र ६ महिना कैद वा दुवै दण्ड हुने उल्लेख छ ।
